Nail Color 巡禮 #9

essie smokin' hot #739

今個秋天，唔知點解瘋狂愛上灰黑色，全身衫褲鞋襪統統都係灰色，為咗襯番成個 look，指甲油當然唔少得啦！揀咗好耐，大部份牌子都冇出灰色甲油，一係就只係得 metallic 色，最終搵到 Essie 嘅冬季新色，cream base 略帶紫色的深灰，I like it!! 搽兩層，出嚟好實色，而且好 glossy，換季襯衫夠晒百撘，而且唔駛成日都係黑色咁悶啦！Good choice~

換季推介橄欖潤唇膏

深秋時份，天氣越嚟越乾燥，咀唇開始成日甩皮同爆拆，於是四出搜括潤唇膏，去咗L'Occitane揀，試晒佢咁多種，都係覺得橄欖 lip balm 最好，夠潤之餘唔會黐立立，而且鍾意佢可以當埋 lip gloss 用，夠晒glossy。好怕啲潤唇膏好似搽臘咁，lip gloss又似搽膠水，哩支就完全冇問題，感覺幾舒服，香味都唔錯，幾清甜，成份仲係有機添。

L'Occitane Organic Olive Lip Balm 15ml
$125

Nail Color 巡禮 #8

My favorite nail color!! Anna Sui利賓納色blink blink甲油，已經買咗兩三年，質地仲好好一啲都冇變，易搽又均勻，最鍾意佢陣香噴噴香水味，keep到好多日，而且個樽真係好靚，放喺度都賞心悅目！



Anna Sui Nail Color [#247]

Nail Color 巡禮 #7

經過咗超忙的一週，連指甲都唔得閒搽，莫講話寫blog，今日有時間做番啲嘢喇。又搵番支陳年指甲油出嚟，Missha都改咗包裝咁耐啦，我仲用緊佢啲舊版甲油，睇我幾長情=P。哩支正宗銀色甲油帶有大量幼閃粉，好metallic同好cool，又易襯衫，不錯看！

Missha Nail Color [GA101]

修身戰績

減肥係做女人的永恒真理，永遠唔會嫌減得多，無論為咗咩原因，瘦咗都可以大大聲同人講減肥成功，而且仲會得到身邊所有人的祝福同讚美，唔單止自己開心，姊妹們更加為妳開心。靚，除咗因為外表，更重要發自內心，個人開心其他人就自然會覺得妳靚，睇嚟減肥真係有益身心健康=P。原本slim fit的牛仔褲依家鬆咗咁多，下季可以大條道理買過啲新嘅，可惜唔記得度吓瘦咗幾多吋，估計有兩吋，有啲褲鬆到甩著唔到。

早兩個月因為轉工作的過度空隙，忽然有好多時間，於是的起心肝去做Gym，除咗想減肥之外仲想做吓運動等個人精神啲，唔好成日死蛇爛鱔咁。平均一個星期去做三次，每次做一個鐘器械加一個鐘kick box，兩個月瘦咗10磅，依家keep住，一個星期去1-2次。做機最主要係build muscle 同修番啲線條，其實我半年前就開始做，但都係好hae嗰隻，間唔中先做一次，一路都冇咩進展。近排keep住做明顯firm咗好多，最明顯係手臂、大髀同肚腩slim咗，而且由原本手震腳震變得有力同實淨。肌肉生長得多咗會加速身體新陳代謝，自自然然令energy消耗得快，幫助減肥。Kick box主要練心肺功能同消耗大量卡路里，修身好快見功。

你哋跟住一定會問我有冇節食。其實我冇刻意唔食嘢，只不過最近真係冇乜心機同胃口，嘢確實係食少咗，但係咩都照食，食零食多過食飯，我諗你哋都係唔好學我喇，我自己都覺得唔係幾健康。But提提你，唔好諗住食生果好瘦，其實好多糖份，千祈唔好攞嚟當飯，而要生muscle需要大量蛋白質，唔好唔食肉。

裸妝必備Lip Gloss

崇尚裸妝，質感愈輕愈薄的化妝品就愈得我歡心，不竟自然是一種美，也是種自信的表現，除了要出席隆重的場合，否則我都拒絕濃妝艷抹上街。雖然家裡化妝品一大堆，真正喜歡用的卻只有少數，買回來的不是顏色不夠稱心，就是質地不太滿意，要不就是因為自己貪新厭舊把它冷落了，今次要介紹的Lip Gloss是其中一件能每天跟在我身邊的寶貝。

KOSE Esprique Precious Rouge Stylish (Liquid Type) [PK825]

其實用Lip Gloss來稱呼它並不合適，正確來說它是液體唇膏，即是說不是搽在唇膏上面的，而是直接當唇膏用，有唇膏的色澤又同時有Lip Gloss的透明感和亮度，一次過完成。我用的是最接近咀唇本身顏色的淡粉紅色，就算不化妝單用它也很自然，令咀唇很潤澤。另外，平時如果先搽唇膏再搽Lip Gloss的話，總有點厚重的感覺，而且兩種東西混合起來有時也會看得出不均勻，但用了KOSE的液體唇膏就完全沒有這種問題，非常貼服。

DIY 美髮Color Treatment

已經好耐好耐冇染過髮，自從剪短咗頭髮之後就冇做過color，除咗因為早兩年興黑之外，最大原因係怕頭髮一長咗少少就變兩截色好肉酸，又要補染，你都知我有幾懶架啦，咁就索性唔攪。但係我份人好矛盾，成日keep住一個look又覺得好悶，尤其是當髮型越剪越短，短到冇得再變型，要等到留番長又有排等喎，結果都係忍唔住要搵啲攪作。


今日試咗Henna Plus隻永久性染髮霜，好多顏色可以揀，都唔知揀咩好，最後揀咗玉桂金色，因為cinnamon係我的最愛 =P。好多人怕自己染髮麻煩，其實我覺得都好簡單吖，將兩支嘢mix好唧落頭髮度搽勻，40分鐘後沖水同落color fix護髮素就搞掂，一盒裡面已經有哂所有要用嘅嘢，咩都唔駛預備，超方便。可能因為我用嗰隻色唔係好深，染髮劑掂到皮膚都冇留低顏色洗唔甩，我仲要係染完先知自己唔記得除耳環，但一啲事都冇喎。我覺得佢最好嘅地方係染完之後頭髮好柔順，顏色有光澤，唔會攪到頭髮旱哂，而且仲好香添。哩個牌子最大賣點係成份安全，不含有毒物質，我諗最啱俾媽咪用嚟染白頭髮，三個月染一次好方便，又用得放心。

Henna Plus 永久性天然染髮霜-玉桂金色
$84.6
from 愛美麗網

Nail Color 巡禮 #6

Super glossy 指甲油，搽一層就搞掂，鍾意佢夠深色，顯得皮膚白白，手指長長。

Skin Food Nail Vita 深酒紅色 #RE106

蜜糖護唇

雖然夏日炎炎，天氣又濕又熱，但咀唇竟比冬天時仲要乾，都要怪冷氣惹的禍，乾紋甩皮不停出現，如果搽埋唇膏仲死快啲，但係好怕搽啲漿糊筆狀潤唇膏，因為驚佢好“臘”，又唔鍾意啲油立立嘅lip balm，好彩有L’Occitane Creamy Honey Lips救命。名符其實，佢真係好creamy，而且有好香甜濃郁蜜糖味道，最重要係搽完之後唔會覺得有一層臘漿住咀唇，或者有啲“立立令”嘅coating，感覺就好似搽cream一樣，咀唇潤番哂唔再甩皮，過一陣會吸收咗，再搽唇膏都唔會上唔到色或者“浮”起哂，非一般潤唇膏可比。

彈彈面膜

懶人都鍾意用懶方法，扮靚都唔例外，面膜紙嘅旦生就係因為世界上有好多同我一樣咁懶嘅人，敷上面上就搞掂，唔駛洗唔駛抹，仲可以帶住佢周圍去，去到邊敷到邊，用完即棄，啱哂現代人。今次用咗OLAY淨白淡斑舒展面膜，最鍾意佢彈彈的質地，而且係完完整整一片，冇喺啲邊邊位度開刀，敷上面上感覺好貼好舒服，唔會好似普通紙狀面膜東飛起一角、西又甩咁一忽，加上佢夠哂柔軟厚身，就算喺冷氣下敷半個鐘都唔會乾或者變硬，直得一讚！敷完皮膚幾水潤，而且白淨，效果唔錯。

附帶一提，買面膜時送了同系列 toner同 lotion的試用裝，感覺麻麻，有啲黐立立，試咗一次之後就冇再用喇。

Nail Color 巡禮 #5

放暑假，換番個夏日look，搽隻好似啫喱糖嘅指甲油，個人都後生幾年。哩支貌似珍寶珠嘅指甲油已經買咗好耐好耐，耐到唔記咗，好似係喺日本買嘅，難得佢啲質地都仲ok，冇乜點變。

DIY 美甲工房

好開心終於買番部相機喇，可以用小腳架校自拍，以後寫 blog方便好多^.^ 前年去日本時買咗包nail art，一路都懶得整，今日心血來潮想試吓，順便試埋部新相機，一舉兩得。

先搽好 color 甲油，今次用咗 Missha 肉色做底，等啲花紋出啲，慢慢等佢完全乾透再開始整花。哩種 nail art 好似貼紙，但質地類似 gel，個底透明，花紋有少少立體效果，只要用小剪刀將要用的部分剪出嚟就用得，再用個鉗仔將 gel 貼取出貼到指甲上，輕輕按下固定位置，加上金粉甲油做點綴，最後厚厚地搽一層 top coat 就大功告成。

Canmake Nail Glitter 金粉甲油 02
Missha Nail Polish [BE04]
Claire's 3D Nail Art Seal

炎夏保濕推介

炎炎夏日，留喺涼浸浸嘅冷氣底下梗係最舒服啦，於是一日廿四小時起碼有廿二喺冷氣中渡過，但皮膚就變得越來越乾，甚至仲乾過冬天，有啲好繃緊嘅感覺，最慘係一離開室內出到街上，塊面就抵受唔住酷熱不停出油，如果用咗啲比較潤嘅護膚品就明顯會有黐立立的感覺，好難受。試用咗Laneige Water Bank Essence_EX保濕精華發覺效果唔錯，搽咗好快就吸收哂完全唔覺得有嘢留喺面上，而且朝早搽咗之後整日喺公司都唔覺得皮膚乾，夜晚搽完瞓覺又ok，由於佢質感比較清爽，同其他護膚品一齊用都冇乜影響，已經差唔多用完一支了（都好難得架喇 =P），值得推介。

Bye Bye 熊貓

Borghese Spa-Whitening PLUS Energizing Eye Mask

識我嘅朋友都知我一向都係熊貓個friend，加上連夜睇波，熊貓同我形影不離，眼袋就嚟大到可以用嚟買餸，點都要急救吓，搵咗Borghese哩set eye mask救救命。一盒裡面有8對mask同一支serum，佢啲mask並唔係一般嘅紙，而係collagen整成嘅薄片，濕咗精華素之後會有啲膠膠地感覺，慢慢會收縮黐住隻眼，唔同面膜紙乾咗就開始甩，敷敷吓瞓著咗，第二朝起身眼袋真係平番好多，冇再眼腫腫，黑眼圏就淡咗少少，都算幾好架喇。跟住幾日直接攞支serum嚟搽眼，雖然唔係完全去到黑眼圏，但就能連眼皮嘅浮腫都退到，效果比用eye gel好，覺得好吸收，一搽落去就吸哂，值得推介。

Nail Color 巡禮 #4

話咁快又到7月，又係新開始，係時候換吓新color。今次用咗Missha淡金色甲油，佢最特別係個掃好闊好大，唔同平時啲指甲油係一小束，所以用起嚟比較容易搽得均勻，搽腳甲就仲啱。顏色好淡，搽兩層依然好透明，但閃爍感不錯，唔會太誇張。



Missha Lucid Nail Polish [GL01]

我的髮型集

想做哩件事好耐喇，終於花費一番苦工搵番啲舊相出嚟。10年嚟整過嘅髮型，全部出自髮型師Fanny手筆，邊款最靚?

Nail Color 巡禮 #3

舊 color，新感覺。用咗幾次就嫌悶嘅指甲油，加層啞色 top coat，即刻有番新鮮感，又唔會嘥料。最 cool 係用喺深色 (如灰色) 或者sharp色 (如鮮紅色) creamy texture 甲油之上，磨砂效果最突出。

鮮桃紅色 Missha Nail Color [PK106] (舊版)

Essie matte about you matte finisher $130

除疤直擊前傳

話說大半年前，有一晚瞓瞓吓覺，忽然覺得被人用利器襲擊，手臂一陣刺痛，即時睜開眼睇吓發生咩事，原來係隻貓唔知因為反瞓定係跳高不遂，由高處轆咗落嚟，抓到我隻手，無奈地又喺眾多傷痕中多加一道長長的疤，真係無啦啦 -_-" 為咗彌補創傷，我買咗支秀碧除疤膏諗住試吓work唔work，好可惜我嘅策略失敗，身上十多道疤痕要搽藥膏實在費時，只係堅持咗個幾星期，最終無法完成大計。

今次重新開始計劃，揀咗三個部位三種唔同嘅疤痕做測試，如果真係有效先至擴充營業。
疤痕1：貓疤，手背上好深嘅界痕，凹陷型，已10年
疤痕2：PK疤，細個跌親留低喺手踭上嘅疤痕，凸出型，20幾年
疤痕3：暗瘡疤，大家最關心嘅品種，人人唔多唔少都會有一兩粒在面上，約2年

測試將為期一個月，按產品說明每日搽3次，結果將會在此公佈。

士多啤梨乳酪面膜

草莓乳酪面膜雖然唔係新出品，但總算係Laneige嘅皇牌之一，單憑佢嘅香甜士多啤梨味，相信已經可以迷倒不少女生。近排可能因為由朝到黑都開冷氣，保濕搽得唔夠，搞到塊面好乾又好嚡，好彩屋企有mask敷吓。哩隻mask含有乳酸，係溫和嘅換膚成份，唔會好似果酸咁刺激皮膚，但仍可以軟化同清走死皮。敷15分鐘享受吓士多啤梨香味，mask會變乾，哩個時候唔好即刻洗走佢，先濕少少水打圏按摩幾分鐘，佢嘅磨砂粒粒可以將之前軟化咗嘅表皮捽走，而且按摩可以幫助養份吸收，捽完之後用清水沖乾淨，皮膚軟滑好多又冇咁暗啞，毛孔都收細咗，跟住再搽護膚品都吸收得快啲。

修眉一番

由於早前太懶，已經有一段時間冇認真地修吓眉，通常只係隨便mang幾吓就算數，今日終於"的起心肝" full treatment一次，等自己變番精靈啲。

Step 1: 用眉鉗將眉下同眉心雜毛清除，順住生長方向一條條拔走。
Step 2: 用剃刀將眉上及之前拔唔清的幼毛剃乾淨。
Step 3: 用刷梳順眉毛，確定眉形 (我係眉峰起角形)，再將過長眉毛用剪刀剪齊。
Step 4: 化妝時用眉粉 (或者眉筆) 鈎畫眉形，尤其要補番缺少眉毛的位置，例如角位或者唔夠長畫番長啲，最重要令兩邊睇落對稱。

大功告成，係咪好簡單？修好眉成個樣望落都整潔同精神哂。

如果你係新手，可以買啲眉尺幫手定位，有唔同眉形揀，唔怕過龍，又可以避免鴛鴦。

工具一覽：眉鉗、剃刀、小剪刀、眉毛刷、眉粉&眉掃。

急救粗糙雙手

返咗大陸一個星期，因為要搬屋，又要照顧新嚟嘅狗仔，每日都不停執嘢、清潔、洗嘢、抹嘢，雙手變得又粗又嚡又甩皮，搽lotion都唔掂，連自己都頂唔順，覺得會被自己隻手刮親，仲起咗幾粒水泡仔，係好耐無出現嘅濕疹，好痕，返到香港即刻要搵啲嘢急救吓。

首先梗係要清除咗啲最難睇又刮手嘅死皮先啦，真係好耐冇試過咁嚴重，修咗十幾分鐘先修好，用專修死皮嘅骹剪仔，沿指甲邊將啲硬皮同甩皮剪走，用哩把骹剪最大好處係剪得好貼好乾淨，又唔怕會剪得太深剪損手，剪好之後已經冇哂啲刮死自己嘅感覺，而且唔會再見到指甲綑哂白邊咁肉酸。

第二步就係搵番支Crabtree Gardeners Hand Therapy出嚟用。顧名思義哩支hand cream係專for啲手粗粗成日要做家務嘅人用，成支都係乳木果油，最啱醫爆拆，我已經買咗好耐，平時都唔係成日用，通常只係好似依家咁嘅情況或者冬天極度乾燥時先出動，搽完會有啲油，但真係可以令粗嚡同硬掘掘嘅皮膚變番柔軟，同埋防止甩皮，搽咗幾次之後已經好番好多喇。

最後又要搵番支濕疹藥膏，我以前皮膚敏感成日出濕疹，通常係手上出水泡嗰種，類似主婦手，不過唔算好嚴重，搽吓藥膏就冇事，哩支Egoderm濕疹軟膏係之以前睇過醫生介紹我用嘅，都算係家居必備，搽幾次泡泡就會榭唔再痕。

如果你都要成日做家務，建議你都預備定以上物品"旁身"，雙手唔護理吓真係會變主婦手架，就算只係被人睇穿你係煮飯婆都唔好啦 =)

Nude Nail Color 搜尋行動

一向都鍾情colorful同bling bling指甲油的我，有一日忽發奇想想轉個nude color look，於是四出搜尋，走訪咗廿幾個牌子counter，都揀唔啱心水，一係就太creamy太實色，一係又太透明搽咗等於冇搽，係接近放棄的邊緣，入咗Paul & Joe間舖頭，終於俾我搵到我想要嘅嘢！佢哋有幾隻顏色都唔錯，我買咗最接近皮膚顏色嗰種，我最buy佢色澤超自然，仲有一丁點非常非常幼細嘅閃粉，喺咁平淡嘅look上加返啲detail，fit哂我要求，而且香味亦很好。搽完覺得非常幼滑均勻，而且可以last好耐，兩個星期唔搞都冇乜問題，用嚟做French nail都好適合。

另一隻強烈推介嘅product係Orly Glosser Topcoat，我估唔係好多人識，但真係超好用，從來唔會用得哂一支指甲油嘅我都已經用咗兩支。佢super glossy嘅質地又薄又貼又襟又易搽，搽完color後輕輕搽一層就好似打咗水晶臘一樣，而且令顏色唔易花，普通透明甲油完全冇得fight，用過其他牌子topcoat都覺得唔夠佢好用。不過最近好似喺香港絕咗跡，我之前喺Sasa買，但依家好似冇咗，如果有人發現請通知我。




Paul & Joe #05 Nail Enamel
$120

Orly Glosser Super High-Shine Topcoat
from Sasa
$69

便覽小工具簡介

唔好意思，開咗Blog咁耐都唔記得介紹吓版面上幾種小工具有咩用，依家話俾大家知點樣可以容易啲返嚟搵我 =)

1. 瀏覽器左上角有個"追蹤"字眼：如果你都有用blogger，只要選擇追蹤就可以喺你登入時睇到我嘅update.

2. 頁面右欄分享/ 加入書籤：可以即時share你睇緊嘅文章，只需喺選單內揀你想post出嚟嘅地方就ok，或者可以揀星星bookmark咗哩版下次再返嚟睇。

3. Facebook Fans Page： 只要喺右欄個box入面按 "Like/ 讚"，你登入Facebook時就會自動喺你個人主頁上睇到最新update，非常方便。

4. 搜尋文章：想睇番之前嘅文章可以按下月份搵出有興趣嘅題目。

5. Add me on Facebook：加我做朋友只需按一下我張相。

6. Follow me on Twitter：用開Twitter嘅朋友只要follow我亦會睇到即時update。

7. 訂閱：可以直接在Google或Yahoo等個人主頁上加一個box show 即時update 內容，揀"發表文章"就會睇到我寫嘅文章，揀"所有意見" 就會睇到讀者post嘅意見及回覆。

8. 每篇文章最尾都有個"喜歡"格仔，睇完覺得喜歡嘅請按下。

有咁多方便小工具，希望大家多啲返嚟睇啦！

Nail Color 巡禮 #2

會被記黑豬的指甲>.<
全隻搽兩層銀白色甲油，再用黑色帶閃粉尖頭甲油捆邊，手要定唔好震呀。哩支黑色幾好用，夠幼又夠實色，Skin Food 銀底甲油都算均勻，但係好脆好易甩，最多只可以維持一星期。

銀白色
Skin Food Nail Vita #PE808p
from Taiwan
NT$55

閃黑色細筆
pa Slender Brush Nail #slim05
from Japan (Fiona手信)
680円

擊退痘痘作戰計劃

早前連續幾晚唔夠瞓，加上天氣太悶熱，搞到面上出痘痘，好彩常備Body Shop嘅茶樹油旁身，雖然味道有啲難聞，好似阿婆啲藥油，但消炎功效確實唔錯，唔係太嚴重嘅痘痘一般搽一兩日就會自動好番，但如果有強力大痘出沒就冇咁快喇，帶膿嘅痘痘搽完會乾得快啲，一穿咗即刻搽就最好，減低翻發機會。Body Shop另外仲有一款棒狀茶樹油啫喱就唔係幾好用，濃度唔夠高又用得快，用唔夠幾次就冇哂，反而精華油每次只用一滴，一支可以用一兩年，大家唔好買錯！之前仲有用過3M出品嘅痘痘貼，但佢其實只係會吸咗啲面油同痘痘滲出嘅液體，冇乜實際作用。

痘痘好番之後好多時都會留低一粒粒瘀色暗瘡印，就算用遮瘕膏都未必遮得住，試下用L'Oreal嘅White Perfect Zooming Spot Corrector，來身哩隻product係用嚟去斑嘅，但我覺得用佢去暗瘡印效果明顯啲，如果乜都唔搽啲印留喺度兩三個星期都唔退，搽咗嘅話大概一星期就明顯淡哂。




中醫話面上痘痘係身體其他地方出現問題嘅徵狀，以下節錄自上期Cosmopolitan嘅feature，如果你都有暗瘡的話就要留意埋其他地方喇！

額頭：心火盛，血液循環有問題，睡眠不足
眉心：心臟弱
太陽穴：膽囊問題，吃得太油
鼻尖：胃火盛，消化系統異常
鼻翼：卵巢、子宮問題
咀唇四周：吃太多，消化不良，腸胃不適
右顴骨：腸功能紊亂
左顴骨：肝膽功能不良
右面頰：肺熱，傷風咳
左面頰：肝臟排毒不順
下巴：腎功能受損，內分泌失調
下顴：淋巴系統排毒不順，抵抗力差

拒絕做臭女人

相信大家都試過放工逼車時身邊有啲滿頭大汗一身臭味嘅人企喺隔離，想避又避唔到，實在好難頂。不過唔好以為淨係啲大叔先會咁樣，好多斯文靚仔都一樣會，只係自己唔留意，我上次仲遇過一個樣貎娟好打扮入時嘅女仔，濃濃嘅汗水加上濃濃嘅香水，更加令人難受。其實唔一定係有"臭狐"嘅人先有汗味，一般人出汗汗水氧化咗加上細菌滋生，都會變成異味，尤其是香港大熱天時又濕又焗，情況更加嚴重。唔想為咗啲咁少嘅事失禮人，每朝早花10秒鐘時間用止汗產品，都係舉手之勞啫！介紹Rexona幾種產品俾大家。

止汗噴霧用起上嚟最方便，但係就比較快用哂，噴出嚟係粉沫，有香味好快乾，新包裝噴頭上有開關制，連蓋都唔駛開就用得，不過我嫌佢啲"煙霧"太厲害，好容易搞到我哩啲嚴重鼻敏感人士打乞嚏，我通常用嚟噴腳保持乾爽，最適合著密籠鞋又唔想著袜露條邊出嚟咁難睇。之前用過Fa嘅止汗噴霧，效果差唔多。

Rexona Anti-Perspirant Deodorant (Cotton)

$27.90

另一款係滾珠式止汗劑，液體狀要等一陣先乾，只係適合腋下用，但Rexona係我用過咁多牌子中最清爽嘅，之前用Nivea總係有啲濕淋淋感覺，唔係幾舒服，而且Rexona哩隻味比較清淡，唔會點影響香水嘅氣味。唔好睇佢細細支，其實好襟用，一支可以用幾個月。

Rexona Anti-Perspirant Deodorant (Skin Light)

$23.90

Rexona亦有專for男士用嘅噴霧，同女士用嘅差唔多，只係"男人味"好重，噴完已經好似搽咗古龍水。唔想老公變臭男人就買支俾佢啦，尤其經常要外出做嘢嘅就更加唔好懶。

Rexona Men (Body Active)

圖為舊版，最近已換新包裝

順便提提你，止汗劑同香體劑係唔同架，寫明有有效止汗成份嘅先係止汗劑，只有酒精同香味嗰啲香體劑係止唔到汗嘅，只可以當涼涼哋嘅香水用。仲有所有香水都唔可以蓋住汗臭味，大汗的話更加唔好噴香水，兩種味加埋一齊真係唔掂。

Two-Phase Make-Up Remover 大比拼

潮流興用Cleansing Oil 落妝，Two-Phase Make-Up Remover 已經買少見少，好多牌子都唔出，但係我始終唔多鍾意用Cleansing Oil，因為覺得眼妝好難卸，尤其是近睫毛位啲眼線、閃粉同mascara，捽捽吓又會捽入眼，所以一直鍾情用一半油一半水嘅眼部卸妝液，只要用化妝棉輕輕敷住眼睛幾秒再抹走，所有water proof make-up都抹得甩，連睫毛中間啲隙都OK。雖然話係眼部卸妝液，我通常都係用同一支抹哂全塊面，唔分咁多，其實除咗眼妝難落，其他area冇乜難度，因為我唔用防水化妝品，淨係洗面都洗得乾淨。


最初用Two-Phase Make-Up Remover係用Lancome，雖然好好用但後來嫌貴轉用第二啲牌子，用過Kose、L'Oreal、Sephora，感覺都唔差好多，無論賣相同質地都非常接近。今次買咗支Skin Food嚟試下，比較唔同，上層係乳化咗嘅油份，望落好似牛奶咁，亦有好香牛奶味，下層同樣係水狀。正式用時比較容易搖勻，搖完唔會即時分番開兩層，質地較其他牌子油啲，抹起嚟都抹得幾乾淨，但唔似其他牌子就算唔過水都覺得爽，Skin Food抹完之後會有油剩低喺面上，一定要沖水，不過影響唔係太大，因為我每次落完妝跟住都會洗面，整體算OK。

Skin Food Milk Shake Point Make-Up Remover

$135/ 160ml

L'Oreal Gentle Lip and Eye Make-Up Remover
from Mannings
$69.90/ 125ml
(最近好似冇得賣，唔知係斷貨定唔出？)

Sephora Eye Makeup Remover
RMB59/ 50ml
(哩支係上次出trip去北京時，因為唔記得帶而走去買嘅，嗰邊Sephora開到周街都係，個個商場都有一間，買咗細支當旅行裝用，大支好似賣RMB89)






Kose 嗰支留低咗喺大陸屋企，下次先補番張相
from Seibu
$120

Nail Color 巡禮 #1

唔知由幾時開始，屋企有N咁多指甲油，諗番我點解咁鍾意搽指甲，應該要追溯到幼稚園個年代。記得有一年過新年，阿媽唔知係唔係貪玩買咗兩支指甲油俾我扮靚，我搽完覺得好得意，於是就愛上咗佢喇！你話父母對仔女嘅影響係幾咁深遠呢。

既然都買咗咁多指甲油，冇理由唔post出嚟架。我通常每兩個禮拜換一次畫，啲friend見到我嘅反應一般都係話"你啲指甲又唔同咗色喎" ，係呀，次次都唔同色，指甲油已經長駐咗喺我個shopping list入面，只要一見到有鍾意嘅顏色就會買。

今次用咗Canmake紅色透明底閃閃甲油，搽出嚟淡紅色入面有大量粗幼不同嘅銀色閃粉，好bling，先薄薄哋全隻指甲搽一層，待乾後再喺近邊位置厚厚搽多一層，懶得嚟又可以有啲層次，順便遮住指甲條白邊，最後搽多層top coat就完成。哩隻Pretty Girl Top Coat只係一般好用，唔夠glossy又唔係keep得好耐，下次先介紹另一隻正嘢。

Canmake Colorful Nails
from Citysuper
$40


Pretty Girl Quick & Shine Top Coat
from Sasa

冬菇頭也要造型

天氣一日比一日熱，忍唔住要提早剪下啲頭髮，雖然本身都唔係好長，但係黐住條頸真係好難受，於是又去紅磡搵我個御用髮型師Fanny變吓個look。Fanny幫我整頭整咗十幾年(講到好似好老咁...)，得佢最知我心意=) 今次將頸後嘅髮腳全部摌哂，徹底地變成冬菇頭，好舒服。佢次次幫我剪完都話我變番小學一年級個髮型，咁都幾好吖，又後生多幾年。但係話時話，冬菇頭唔gel吓又真係會似小學生嘅，搽番啲造型髮蠟set番少少層次會型啲，可惜香港天氣潮濕，用過幾種wax都唔係好夠挺，之前頭髮再短啲嘅時候還好，一長咗少少就完全立唔起，依家改番個look又轉吓gel頭方法，唔駛再豎起啲頭髮，反而自然啲。Mr. Mo都同時改咗髮型，由上次嘅黃曉明冬菇look變咗今次嘅吳彥祖極短頭，好清爽。以下係我哋用開嘅幾隻hair wax，介紹俾各位參考。

Gatsby Moving Rubber Spiky Edge
幾隻之中最挺，可以豎得起，果然係sell男士髮型，同女仔用嘅product差好遠，但喺上海同北京用時明顯效果勁好多，最主要都係天氣影響，好鍾意佢個packing。

Lucido-L Smash Fixer
明顯係sell女仔，短髮/ 男仔頭都唔啱用，完全唔可以有立體或豎起嘅效果，連佢張廣告相個look都做唔到，只可以將髮尾輕輕扭番少少層次，幾隻之中最弱。

Liese Clear Cube Wax Hard
比Lucido堅少少，短頭髮可以做到立體效果，長啲就只可以做到少少層次，但質感比較輕同爽。