Liza的扮靚日記: 滑嘟嘟指甲Subtle的美

2010年4月30日星期五

滑嘟嘟指甲Subtle的美

想當年仲係中學時代，返學唔可以留長手指甲，更加唔可以搽指甲油，但係又想指甲靚啲，無意間俾我發現咗一set甲面挫，覺得好正，用完指甲"立立令"好似打咗臘咁，但後來想再買已經搵唔返喇。試過其他類似product都覺得效果唔好，最近終於俾我喺Citysuper搵到好嘢！哩款甲挫一包有兩支，每支有三個不同的面，只要順住次序挫滑指甲表面就OK：先用最粗1號粉紅色面，挫平指甲表面的凹凸坑紋；再用2號白色面磨滑甲面；最尾用後面3號灰色面拋光，指甲就會變得亮晶晶。

我啲指甲一向都有好深嘅直紋，唔理佢會覺得好粗糙同暗啞，經過以上方法處理之後即刻唔同哂，如果要搽薄貼的指甲油就更加明顯，會均勻好多。我諗哩個方法亦都好啱啲唔鍾意搽指甲油的朋友，自然得來又有少少出奇不意的美；或者薄薄地加上一層nude color glossy甲油，都係OL唔錯的選擇。不過奉勸各位，如果本身指甲好薄或者好易斷的話，小心唔好挫得太深，以免遭殃。