歡迎加入我的扮靚Blog,請到Facebook接收更新,同埋多多入嚟留言 =)

2010年5月4日星期二

打破新鞋的宿命

又到換季嘅時候,一堆新鞋已經等住我著喇!夏天梗係要買番幾對涼鞋同高踭鞋襯衫啦,無奈次次著新鞋總會腳痛、刮損腳、起水泡,好似宿命一樣,鞋同腳總唔可以安安樂樂一齊生活,個人又跌watt,行街都冇哂心機。為咗唔好讓悲劇再次發生,著鞋之前唯有做多啲安全措施,於是即刻去櫃筒底搵番個好幫手出嚟!


哩卷係N咁耐之前Kathy俾我嘅醫用透明膠紙,哩個方法都係佢教我嘅,由於換一對新鞋都只係頭一兩次著先要用到佢,所以用嚟用去都未用完(即係話我都唔係買咗好多鞋啫),要買的話屈臣氏有3M Nexcare Clear Tape 1"闊,$29.90,可以cut開一半用1/2"闊都夠。只要貼喺腳上危險部位如腳踭同腳趾,就可以大大減低刮損的機會,而且因為係透明嘅關係,就算露出嚟都唔係好覺眼,唔會好似貼膠布咁肉酸。另外,爽健有專貼鞋內腳踭位嘅透明啫喱貼都可以幫到手,不過就厚咗少少,如果對鞋已經好窄就唔係好啱用。仲有,著鞋前可以先喺鞋裡面搽一層爽身粉,咁會著得舒服啲同埋冇咁容易起水泡。















如果真係唔好彩刮損咗腳,經我多年貼膠布嘅經驗,我強列推薦用Johnson Tough-Strips,其他款式一概唔掂,唔駛哂錢試喇,得哩隻夠大塊夠厚夠彈性,又黏得實唔會捲埋一"住",貼咗可以keep兩日,沖涼都唔甩,用埋滴露藥膏就仲好啦。

6 則留言:

  1. 滴露藥膏<--未見過喎,有咩好?

    回覆刪除
  2. 損手爛腳時搽,消炎殺菌防止紅腫,搽咗冇咁痛同埋快啲埋口。 我哩啲成日被貓抓損嘅人,梗有一支看門口=)

    回覆刪除
  3. 等我介紹俾我D愛貓朋友用先~~XD

    回覆刪除
  4. 我用過SCHOLL的PARTY FIT, EXACTLY相入面果隻, 絶對唔惦(可能我隻腳太渣), 好硬, 仲搞到我隻腳板起"怎", 不過當然有好過無. 但SCHOLL另外一隻貴少少, 綿質果隻正好多, 夠軟同厚身, 又可以用好耐, 起碼著高跟鞋時可以行多3粒鐘, COUR CARRIE 同STAGE OF PLAYLORD D SALES都建議買呢隻.

    回覆刪除
  5. 嗰包PARTY FIT有三對,我都係用咗一對就放咗入櫃筒底喇,所以仲可以攞返出嚟影相 =P

    回覆刪除